اخر كلام من ارض الحنان في يوم القلب والاحزان فبل الافراح

انا المرادي بكتب ومش عارف هاكتب عن ايه ولا ايه ولا ايه

ومش هاحط صورة كمان

عندي الف موضوع اكتب عنه

عندي كلام كتير اوي وخايف عليكم منه

عايز اكتب عن للي حصلي في فرح اخويا وعن الفرح نفسه

عايز اكتب عن تقضيتي النهارده الفلانتين ازاي وعملت ايه

عايز اكتب عن الساعه اللي بدأت تتدق وتنبهني ان ايامي بقت معدودة هنا في مصر

مش بقلكم انا عندي بلاوي

بس انا هاكتب عن الفلانتين كيوم في عمري

النهارده

بقالي اسبوع برتب ليه بمهد ليه وهاقضيه ازاي

ومين هاقله وحشني ومين هاقله بحبك ومين هاسلم عليه سلام الوداع قبل الرحيل

كنت رتبت اننا الصبح هانزل الشغل الله يرحمه اعيد على صحابي هناك

واجدد محضر الموبيل الله يرحمه هو كمان

وبعديها هاقابل همس الوجود واقضي معاهم بقيت اليوم وكنت ناوي اجيب ورد الصبح وانا رايح اقابلهم

وحلمت ورسمت اليوم بشكل خرافي

جيت البارح بالليل لغيت الجزء الاول من اليوم وقررت اخد اختي معايا اهه اسيبلها ذكرى حلوة وفسحه حلوة وتقضية وقت احلى قبل مسافر

وقررت اننا ندخل انا وهي سينما مطب صناعي

ونكمل اليوم وهي معايا

جيت البارح بالليل ببص لقيت همس الوجود

(s)

اعتزرت منا قلت قبل كدا الموت مابيفرقش بين كبير وصغير

وانكسر نص الحلم

بس حلفت لازم اعيش اليوم مع اختي واعرفها انا بحبها قد ايه

وجت بالليل من اقرب الناس ليه بووو

واتفقت تحضر معانا السينما

لكن كل المعتاد اتلغى الموعد وقررت اننا رايح انا واختي

واللي عايز يجي يجي وبلغتها بكدا

بس فعلا الغالي غالي وجت تاني يوم

بس عمر مالحلو بيكمل وقضينا ساعه مع بوووبس كان لازم السلام اللي انا كنت بهرب منه سلام الوداع

وجت اللحظه اللي دخلت انا واختي فيها السينما

وضحكنا وهرجنا وانا الوحيد اللي كنت بدمع

وطول الفلم كنت بسرح مع نفسي وبحلم بلحظه كان قلبي معايا وكنت بجيبله الورده واعيد عليه واشوف الفلم لحظة بكاء زينه دي الطفله اللي في الفلم

وانا اعيط وابكي وايدي تمسك الموبيل وتضرب النمرة وارجع واقول خلاص اللي كان

دا مابقش ليك سيبه يعيش اليوم مع الللي ليه

وعيش انت لحظة كدب واحلم باليوم ده مع اي حد تاني

وارجع واضحك واتعايش مع اصوات الضحك المتعاليه في الصاله

وتشدني لحظة يأس من ميمو لما يلاقي الكل بيحاربه

وفي نظرة بريئه من طفله زي العسل يسترجع لحظات اصعب ويقرر الحرب

وارجع انا اقول انا اتنازلت بسهوله انا كنت ضعيف في حبي

وارجع وابكي بصوت مكتوم واختي جنبي تبص وتستغرب وتقلي انسى وعيش الضحكه

وانسى فعلا واحاول اشد انتباه يسو-اختي- واقرب منها

وبشكل تاني احاول اطلع حنيني وحبي ليها

كان نفسي في لحظه اشد يسو واحضنها واقلها انا مش ضعيف

انا بس تايه وهارجع تاني ان شاء الله

وخلص الفلم بنهاية سعيده كالمعتاد

وكأن كل المشاكل ممكن تتحل في فيلم

اه يابلد نفسي اعيش فلم اكون عارف بدايته وعارف نهايته وانا في احداثه برسم وبخطط

وركبنا وفي طريق الرجوع اختي نامت وراسها مالت على كتفي واديها حضنت دراعي

ياه الله

بجد هاتوحشني البت دي نفسي بجد لو قدر الزمن ودخلتي يا يسو هنا تعرفي انا قد ايه بحبك

بصيت لوشها لقيت البراءه ولقيت انا بدمع

لا مش بحب العياط بس اختي دي هي انا وانا هي

احنا مش مجرد اخوات احنا اصحاب واحباب وكل حاجه كل حاجه

اختي هي الصغيره وهي البنت الوحيده وانا وهي دماغنا زي بعض بس احساسنا مش زي بعض

انا بحب الاطفال وبحب اعيش معاهم لكن محبش اعيش الطفوله

هي بتحب تعيشها وبتحب تعيش معاهم

انا بحب الحزن والصدق وبحب التجمعات وبحب كل الناس وعندي الناس ثم انا او بشكل اخر

الطوفان ومن بعدها انا

اختي بتحب الابتسامه قليلة الشكوى عزيزة النفس حتى معايا

بتحب اللي يحبها وتكره اللي يكرهها

مابتسبش حقها بتعرف تكون بارده وتنرفز اللي حواليها

بس بجد طفله وانا بموت فيها

انا وهي لينا جو خاص بينا محدش يفهمه زينا

ممكن نضحك مع بعض نتكلم مع بعض باسلوب

لو حد شافه ممكن يقول اننا اعداء وناس تانيه يقولوا اطفال

بس مهما كان مابنتكسفش اننا نخرج مع بعض

دنا حتى رقصت معاه في الفرح سلوو وبلدي كمان

وكل اللي موجودين قال علينا مخطوبين مش مجرد اخوات

دنا حتى كنت ايام الكليه بحب اروح اعد معاها ماهي كانت في نفس الكليه معايا

واهه بدأت الايام بتجري والايام بتعدي

وبقت لحظات واكون في الجو وبعدها انزل للارض وسبحان الله في مكان تاني خالص

مكان انا خايف اكرر فيه عمر فات

مكان مش هلاقي فيه اهلي ولا اختي

مكان مفيهوش غير شغل ونوم واكل

مكان لامجال فيه للحياة

وياريت كان فيه اللي يشارك المجهود ده ولا حد يشاركك الحلم

وساعة التعب تلاقي الصدر اللي يقلك ارتاح تعالى هنا في حضني

ولا حد يهتم لما تبتسم في وشه ويملا عليك الدنيا

او حتى يخفف عليك لحظة تعب ويشيل عنك الهم ويسيب مكانه الفرح

بجد هاتوحشيني يا يسو

هاتوحشيني يامصر

ياعمري اللي فات واللي جي

هارجعلك تاني ومش هاعيد مشاور العمر

هارجع لحضنك واجمع حوليه كل الاهل

واملا ليلك بضحكة من كل قلب

واخر الليل انام في حضنك وانا سايبلك كل الهم

واصحى الصبح وابتسمكم لشمسك واقول يالله يامصر

نفسي اغمض عين وافتح الاقيكي يامصر غير كل عصر

ياترى ممكن ارجع والاقي ناس غير الناس

بجد هاتوحشيني يامصر

ودي بوسه لكل اتنين بيحبوا بعض وضحوا من اجل بعض وعرفوا يحافظوا على بعض

ودي تحيه ومواساه للي فهم ايه هو الحب قبل مايصارح المحب

قبل مااي حد يظلم الحب

ويارب ارجع الاقي يسو عروسه واعمل لها اللي معملتهوش لامير اخويا ربنا يقويه يارب

ودي وردة لقلبي الي انحرم في يوم بيحلم بيه بفرحة تملا عليه الكون وتنسيه كل اللي فات والي جي

ووردة بيضا لكل من تالم من بعد الحبيب وكان وحيد

ورده بيضا لكل من قدر الصداقة وعرف انها وقت الضيق

لكل من عرف انا محتاجه قد ايه رغم انه مجاش وكان ظهري في يوم الفرح

ووردة حمرة لكل حبيب وحبيبه

ورده حمرة لكل اتنين ربنا اسعدهم وعرفوا يبنو الفرح من الالف للحاء

وربنا يسترها وعيد حب سعيد