حالة توهان

مش عارف ايه الحكاية

احساس فظيع لما تحس انك جواك حاجات كتير حاجات ملغبطه
خليط من الحزن والفرح
خليط من رغبة بالبكاء والضحك
خليط من الشعور بالضعف والقوة
خليط من الانهزام والنصر
شوية خرطبيتا زي مابيقولوا

-------------
واولهم

من كام يوم كنت طاير من السعاده
رابع يوم في العيد كنت في ستي استارز مع اصدقاء عمري
دول اهم اتنين قابلتهم صحيح كنا ناقصين واحد
بس انا اللي عملت فيهم كدا منا اللي خليتها تقرر البعد عنا
وهافضل شايل ذنبها طول عمري
اصلهم همس الوجود
همس الوجود همه حياتي
لو كنتوا قريتوا بوست قلبي وحياتي 3
هاتعرفوا همه مين
همه ناس عاديين جواهم حاجه جميله
لما تحس بعنيك وتتكلم بقلبك وتلغي عقلك
لما تبقه عايز تقول مليون كلمه في كلمه
لما تكون عايز تصرخ وتقول همه دول حياتي ومش عايز غيرهم
لما تلاقي نفسك ماشي في كل مكان في كل زمان
ومفيش غيرهم على لسانك وفي قلبك وشاغل تفكيرك
في اللحظه دي اعرف انك مع همس الوجود
كان جوانا خوف بنداريه كلنا جوانا خوف من الفراق من البعد ومن تلاهي الدنيا
بس عدى اليوم وانبصتنا وفرحنا وضحكنا وحسينا بتاثير الدنيا علينا
ياه دا من زمان مقعدناش مع بعض مضحكناش مع بعض كان بينا تلفونات وبس
وزي مابيقولوا الايام الحلوة بتعدي في ثواني ( ايهاب توفيق)ء
وكانت عنينا كلنا بتقول مع السلامه ياعمري اللي فات
مع السلامه ياأجمل حقيقة في الدنيا
ولاول مره واحنا ماشيين نحس اننا ممكن منشفش بعض تاني
وتاني يوم سافرت اول انسانه
(S)

دي بقه مقلكمش انا مسميها قطة مشاكسة

دمها زي العسل بحبها اوي اكتر من اختي

ميزتها ان طموحها كبير اوي

ونفسها تكون صغيره بس الدنيا علمتها

علمتها القوة الطيبه علمتها الجد والطفولة

عليها كلام زي السيف

بيجرح لكن بيساعد في عبور مليون ميل

فاكر كل كلمة وكل خناقه

فاكر كلماتها وهي بتعتزر

عمري مشفت انسان عنده القوة دي وهو بيقلها

كانت بتعلن انتصارها عليه في كل مره تكلمني

مش بقلكم بحبها اوي اكتر من اختي
ونرجع تاني ولاول مره نفضل نتصل بيها لاخر لحظة لاخر ثانيه على ارض مصر

وبدون ماحد من بقيت المجموعة يعرف ان التاني بيتصل

ده هي حتى زهقت وافتكرت ان فيه حاجه
بس مابينا مابنزعلش من بعض

ده حتى هي اول ماوصلت رنت وطمنتنا
واستنينا لغاية لما قبلناها على النت وفرحنا مووت
وفجأة اتقلبت قاعدة حزن وكل واحد جواه حنين كتبه وقاله

مالقلب بردو ليه طاقة

والدنيا مابترحمش اللي كاتم وساكت

اصل الدنيا رمت التراب على قلوبنا

وكان لازم نفتكر ان لينا قلوب

ونشيل اثر الزمن من جوانا
كل واحد كان بيحس بخوف كتبه وقاله
ماهي تاني واحد يبعد عن همس الوجود

اللي كتبت عنها يوميات قلب مستميت(H)بعد
ومقدرتش اداري خوفي من الزمن
ماهي كلها كام يوم واسافر انا كمان
(M) وهايفضل رابع واحد اخويا

ده بقه مقلكمش كنا نايمين شاربين مع بعض

نذاكر مع بعض نتخانق مع بعض

حتى الهم كنا نشاركة مع بعض

هو عنيد اوي ودماغه ناشفه

بس جواه قلب زي البفته البيضه

نفسي اساعده اوي اعرفه ان الدنيا محتاجه العب

اصله عايز يكون قاسي مع الدنيا

لكن جواه قلب مؤمن راضي بقدر ربنا

هو اول واحد حققلي معنى كلمة الصداقة اللي حلمت بيها

هايفضل هنا في مصر رغم انه بيفكر يسافر اقصد يهاجر

هو كمان زيي تعبان من الدنيا طهقان

بس ساكت مابيتألمش شايل جواه

ولما بينفجر مابيلقيش غيري انا وياه

بحبه وللابد مش هنساه

وخلاص هاتبقه همس الوجود مجرد همسه
بس انا خايف مكنش موجود

بس والله لازم افضل مع همس الوجود
لاننا جمعنا قلب واحد وحب واحد وخوف واحد
جمعنا صفاء وراحة

جمعنا صداقة واخوة
جمعنا عقل واقف وقلب نابض
يكفيني لانهم همه اللي علموني الدنيا

في وقت كنت تايه فيه وفي دنيا جديده غير الدنيا

عرفتهم اكتر من خمس سنين اكتر ماعرفت نفسي

همه دول همس الوجود

وهافضل اقولهم زي ماقلتلهم زمان

الصداقة منبع الحب والود

فالتبقى صداقتنا ينبوع ترتوي به اغادير قلوبنا ومطر ينعش ارواحنا

فالتبقى زهرة تنمو وتكبر في ظل علاقتنا ويرويها الحب والود الذي بيننا

بس هافضل حاسس بالضعف وهمه بعاد والخير لما بس اشوف وشوشهم

نفسي اعتذر واقول انا اسف اننا سبب في ضياع ضلع مننا

بس والله كان نفسي نرتبط

مش بقلكم حاسس بالعجز مش قادر اجمعهم
وهمه دول همس الوجود

-----------------

اما ثانيا

البارح جت اختي طلبت مني اساعدها في المذاكرة
ماهي اصلها في نفس كليتي
بس انا ماتعودتش طلب من حد مساعده
دنا حتى مكنتش باخد دروس خصوصية
بس عشان حاسس بصعوبة الكلية واللي بيتعمل فيهم فصعبانه عليه
مقدرتش اعمل معاها حاجه غير اننا اترجملها الماده
لكن اشرحلها ازاي منهج كامل وانا مكنش حد بيساعدني

ازاي اعرف اساعد وانا مكنتش بخلي البيت يساعدني
دنا مكنش حد بيشوفني وانا في الامتحانات ولا حتى بيعرفوا ان ورايا امتحانات
اصل اختي اخر العنقود واتعودنا ندلعها
بس اعمل ايه مش عارف اساعدها
مش عااااااااارف
حد يساعدني
والله نفسي اساعدها واللي هنا فاكرين اننا متكبر عليها بس هيه حاسه بيه بس مش لاقية وقت تعرفني
مش بايدي غير اننا اذاكر واحاول افهمها

نفسي لو قريتي الكلام ده ياسمونة قلبي
تسامحيني

واهه هاسيبها وهسافر ومش عارف في بعدها عني هاعمل منغيرها ايه
مش بقلكم حاسس بالضعف

--------------

وثالثا
اخويا اهه قرب يتجوز اول الشهر
ومش راضيين يوافقوله على الاجازه
وهو عامل زي اختي لما بيقلق بيتعب وبيجيله امراض الدنيا
وانا هنا مش عارف اعمله حاجه
اخويا ده من يومه وربنا تاعبه في حياته
ثانوية عامه مدخلش بيها الكليه اللي هو عايزها وبيحلم بيها
وفي الكليه وقع سنتين

ماهو اللي شال بنى البيت بتاعنا على كتافه ماهو كان راجل البيت
وهو اللي بنى فيلة عمي في البلد

وكان بسببهم وقع سنتين في الكلية
ولما خلص قعد سنه كاملة في البيت
واشتغل بعديه ست شهور في الصحرا هنا في مصر
ولما خطب كان بابا موريه الويل

مش بقلكم ده حمل زيادة عليّه

-------------

ورابعا

بعد الكلية عرفت مجموعة الاس اي
مجموعة شباب وشابات كنا بناخد دورة كوبيوتر دورة موس

بس كنا شباب فعلا وهافضل اقول انهم اختارونا على الفرازة
اصلنا عرفنا بعض وعشنا تلات شهور بس مع بعض

حبيتهم اوي اوي وكان منهم (اودي)صاحبي اصل العادي بقه
وكان فيها شريف شاب عسولة وجميلة اوي

عجبني فيه حبة لوالدته وحرصة على بالوالدين احسانا
وكان فها تامر البطاوي صاحب القلب الطيب
الاول علينا بس في الصفوف الخلفيه
وكان فيها محمد حافظ راجل ونعم الرجال

كان استاذ شكله وهيئته اكبر من سنه
وكان فيها محمود البكل
انسان بمعنى الكلمة اخلاق ودين وعليه حتة ضحة لا يمكن انساها
وكان فيها البنات

بونوكيو

عليها ضحكة وهم على القلب اتعودت تخفيه ورى ضحكتها

منا سمتها ( بوووو)ء

ونور وشمس وقمر وكواكب بنات بحق الكلمة

وفيولين ولوليتا عليهم حتة حرص ونظرة عين لاتعرف منها اه ولا لا

اكيد همه فاهميني لو قدر الزمن ودخلوا هنا
اقسمنا بالاخوة والمحبة ومتخيلناش اننا نكون كدا لبعض
بنبص لقينا اللي اتخطب واللي اتجوز

وكان لازم نحضر فرحتهم لاننا فرحنالهم
واللي اشتغل ودي اهم حاجه فرحتنا

،واهه تنفيذا لامر الطبيعه وتلبية نداء الزمن

الزمن خدنا وبقينا بالعافيه نشوف بعضينا

بس كفاية اننا لسه بنفكر بعض اننا لازم نتقابل كل اخر اسبوع
بس طبعا وحشني اوي شريف اصله مسافر مكان منا هاسافر
والبنات صعب نشوفهم لان هي دي عادات مجتمعنا
وياريتنا نطمن على اللي اتجوز واللي اتخطب
بس مليش غير قلب واحد جواه ناس واحده
قلبها واحد ومن جوانا ابيض زي اللبن

بس الدنيا شغلتنا

--------------------

مش بقلكم حاسس بالضياع منغير كل الي فاتوا

و نفسي اعرف اشوفهم وماقلش عندي ظروف

واساعدهم واشيل عنهم همومهم
كل دي حاجات خنقاني اوي
كل دول ناس حاببهم وفيه كتير حاجات تانيا كتير اوي
نفسي اعرف اصلح معاهم واعيش جواهم
زي ماهمه عايشين جوايا

حاسس انهم همه حياتي واستحاله الاقي زيهم تاني

بس ياما هانعيش ونشوف

والدنيا وخدانا ومش هاتهدى

ولا تسبنا وترمينا في خبر كان