حنين واحلام كاذبه

زي اليوم كنت عايش هنا على الارض دي ومعايا ناس كتير
كنا لسه اطفال جوانا ضحكات صافيه
نتفق نتقابل نطلع الخليج نلعب في الشارع نجري مكناش بنعمل لحد حساب
ودارت الايام
ورجعت لنفس المكان بعد مالعمر عدى وفات
شوارع كلها ابراج بالعشرين والخمسه وعشرين دور
والبيوت ناسها اتغيروا وسكنتها ناس ملاها الهم والتعب
وفيه نفس الناس ونفس الوشوش بس تراب الزمن ملاها
وياسلام لما تتصل بحد فيهم
وتبص الاستغراب مش من وجودي هنا
لا من احتفاظي بالارقام
ورغم تغيير الارقام التلفونات بتاعتهم لكن وصلتلهم
واللي قابلته تيجي تحضنه وتبوسه

بقه الاحضان المصريه والصحه المصريه
تلاقي الرد كل البروود وكأني كنت معاهم البارح
ولما تضحك بطفولة وتاخد راحتك ، اصلهم همه اصحاب الطفولة
تلاقي رسمة الاستهزاء والستغراب على كل عين وكل كلمة
وياسلام لما متسالش ولا تتصل ولا بتاع تلاقيهم بيتصلوا ويسالو

********
والبيت هنا هو نفس البيت بس مش نفس العفش ولا نفس النظام
حتى ذكرياتي فيه اتمسحت مع تغيير النظام
ركن المذاكرة اتشال

مكان النوم اتحط مكانه الكمبيوتر

وكله اتغير ومبقاش فيه ذكريات

ياه تخيل بيتك وانت غريب فيه

حتى اخويا وابويا تخيلت هاعيش حياة تانيه معاهم

هاعيش مع ناس بحبهم ووحشني الجلوس معاهم

لقيت الاب مش حاسس بالخنقه اللي انا فيها

وفاكر ان القعاد من غير شغل سهل

فاكر ان الشغل هايجي بين يوم وليله

اه يمكن هو بيقسى عشان مصلحتي

الغربه علمته القسوة

علمته انا وبيتي ومن ثم الحنان

لكن نفسي احس بالانسانيه جواه

كل اللي عليه بطل الطفولة دي

انت بقيت انسان مسؤول

طب ايه علاقة المسؤولية بالطيبه بالمحبة

بالهزار ولا الضحكة ولا حتى السؤال عن الناس

انسى بقى الصحاب وبتاع انسى الوهم اللي انت فيه

ياه اصبح الحنان والمحبة للناس وهم

انسى الاصحاب محدش يفيد فيهم حد

ومبقاش فيه اصحاب محدش في الزمن ده بقه همه غير نفسه

ليه هو انا مليش اصحاب ليه معنديش همس الوجود

معنديش اخ انسان اسمه مصطفى بكري

كان مجرد شخص اعرفه بس اصبح بالنسبالي اكتر من اخ

ربنا يكرمه هو ومراته يارب

هو من الناس القلائل اللي احترمت فيهم الاخوة والصداقه والصراحه

مفيش صاحب اسمه ضياء رغم همومه كلها لكن البسمه على شفتيه علطول

كل يوم لازم يدخل نت عشان يطمن حتى لو كلمة واحده

معنديش شلة الاس اي

معنديش اخت منها انما ايه

وصديق انما ايه تمام

معنديش اخواتي في التدوين

وغيرهم كتير كتير

ومش هاعد حتى المدونة بقالي اصحاب بمعنى الكلمه واخوات كتير

كل دول والدنيا مش لسه بخير

طب اقله ايه ولا ارد بايه

واخويا نسي اننا السبب في ان جوازه يتم بنفس الشكل اللي كان بيحلم بيه

ومواارهوش غير انه يشتغل على النت ويسبب في الخناق مع ابويا

موراهوش غير مراته رغم انها طيبه جدا

بس مش بيحس بحد غير نفسه ومراته

حتى انا عشان محسسهمش اننا تقيل عليهم بقيت اغسل واطبخ وانشر حتى الغسيل

ومن غير ماحد يساعد ولا يفكر حتى يساعد

وبقيت شغلتي شغاله

حتى لما اجي اتكلم مع حد من اهلي على النت سواء شباب او اطفال

الاقي اللي يقلي قوم اغسل ولا نضف بدل مانت قاعد كدا وسيب لاخوك الجهاز

طب ياعم الحاج انا لسه قاعد

ولا حياة لمن تنادي

طب تخيلو العيله يدخلوا مخصوص عشان يكلموني انا بس ومش حد تاني هنا

من اكبر كبير لاصغر صغير

طب بزمتكم ده معناه ايه

بعد ده كله ممكن اكمل الحلم ولا افوق وابطل احلام

وارجع لارضي وامي قبل مانسى انا كمان ان ليه قلب

بعد ده كله احن للابوة والاخوه ولا اخاف واقول وبالوالدين احسانا واخفي اللي جوايا

بقيت اخاف من اننا اقول كلمه حلوة لبيتي لاحسن يخدوها تريقه

مفيش غير اختي

بحبها اوي وهي طيبه اوي وعارفه معناها ايه المحبه والعطف على الناس لسه ماخدتش من طبع القسوة

وحشتني اوي

وحشتني مصر وحشني كل انسان رغم تعبهم لكن جواهم قلب متنزلوش عنه

ناس لسه عارفه معنى الضحكة

مش وشوش ملاها الغضب والكره

وشوش عف عليها الزمان
يعني لما اكون مخنوق اجري على الناس ولا ادور على بيتي افضفض معاه

الاب على راي مها (غربة وطن) نسي انه اب وفاكر انه بنك بالنسبه لينا

ياه نفسي ارجع طفل

انا اللي على الشمال واخويا اللي على اليمين

احيانا بتمنى اليتم بس احيانا تانيه بقول الحمد لله

واقول انا هاجرب العيشه بعيد عنه

واتمنى واقول ربنا يطول في عمره يارب

ده هو برده اللي اكلنا وربانا

ههه ربانا

واحنا في مصر وهو في الكويت

ارجع واقول ده هو اللي عيشنا

ياه بقه الناس تخرج مع اهلها وانا واختي بينهم من غير اب

كل ده عشان المم والفلوس

ياخي يلعن ابو الفلوس اللي تموتنا من القهر

يمكن حد يعترض على كلماتي

بس انا في جحيم

نفسي ارجع الف بين المدونات وادون تاني مش قادر ومش عارف

واساسا ممنوع عليه الكومبيوتر وبدخل بالعافيه على الموبيل

ياه

هو انا دخلت في عالم غلط

ولا انا طلعت في طياره غلط

ولا انا اللي جيت هنا غصب

هو انا بحلم ولا ابقى متخلف لما اتمنى الضحك

ولا معقول يكون كل مسؤول لازم يكون قاسي

مالناس بتنطحن في شغلها

وترجع بيتها بتبتسم في وش ولادها

ايه هو ده حلم كاذب

ولا حنان لناس مش هي الناس

ولا كلام كانوا بيضحكوا بيه علينا

طب منا عايش كدا وماتغيرتش من صغري

يعني باسلوبي ده عرفت اعيش الى الان

يبقه انا مش غلط
ياه نفسي ابكي وادمع

بس مش لاقي حد يحس بيه

ودمعي بقه غالي عليه

ياه يامصر

رغم التعب على ارضك لكن علمتينا الضحكة وقت الزعل

خلتينا نشتم فيكي علطول لكن علمتينا القلب الصافي

علمتيني الفرحه بين الناس والبسمه بين الكلمات

علمتيني وقت البكى ابكي وان فيه الف قلب بيحس بصوت الحزن المكتوم

علمتيني ان بلدي هي مصر

عملتيني ان مصر هي مصر وفي كل عصر هي مصر

علمتيني ان كل شيء حلو معاه الوحش

وكان الحاجه الوحشة معاكي هي حكومتك

بس الشعب هو الاصل

يامصر بنادي باعلى صوتي

انقذي ولادك من بين ايدين الغدر

زمن غدر بكل من خرج بره مصر

زمن سرق قلب كل مصري واداله مال والف صخر

يامصر ضمي ولادك بين اديكي قبل مايمشوا وينسوا الاصل

يامصر نادي على كل ولادك نادي ورجعيهم

ده ولادك فيهم لسه قلب

قلب اتحبس في قفص كله دهب بس اسمه حبس

يارب اعرف ارجع تاني بين اهلي وناسي

يارب مايكنش حالي هو حال والدي

اتغرب ومش قادر يرجع لبلده مصر

يارب ماتكنش حياتي بره مصر

بحبك يامصر بمرك بوحشك بحبك يامصر

بس لو ولاد الكلب يبطلو يعضوا ايدك يامصر

يامصر مدي ايدك لكل قلب

ودوسي على كل ندل

محبط يامصر

محبط يامصر

************************************************************

ملحوظتين:

1- تم اضافة الاخت مها صاحبة غربة وطن للبلوج الخاص بهمسات بالمغنى وتم تنزيل اغنيه في البلوج لفيروز وتم تفعيل البلوج حاليا

2- معلش بالنسبه للتاج اناهاعمله يعني هاعمله ده التاج علينا حق بس التاج ده عايز دماغ
معلش لسمراء النيل ومعلش لاسراء ولمها واودي صاحبيكا وكل من كتب وانا مدخلتلوش بقالي مده